Գարի Չապման
«Սիրո 5 լեզուն»

Ըստ Գարի Չապմանի, գոյություն ունի էմոցիոնալ սերն արտահայտելու հինգ լեզու, որոնք ճանաչելն ու այդ լեզվով խոսելը կօգնի գտնել երկարատև և սիրով լի ամուսնության բանալին:

Gary Chapman – ԱՄՆ, փոխհարաբերությունների խորհրդատու, «Սիրո 5 լեզուն» գրքի հեղինակը: «Marriage and Family Life Consultants, Inc» — ղեկավարն է, վարում է ամուսնության և փոխհարաբերությունների վերաբերյալ սեփական ռադիոհաղորդումը: Ազգային և միջազգային մակարդակով համարվում է փոխհարաբերությունների էքսպերտ:

Գարի Չապման. «Սիրո 5 լեզուն» (առանձին հատվածներ ազատ թարգմանությամբ)

Ըստ լեզվաբանության, գոյություն ունեն մի շարք հիմնական լեզուներ. ճապոներեն, չինարեն, իսպաներեն, անգլերեն, պորտուգալերեն, գերմաներեին, ֆրանսերեն և այլն: Կյանքի ընթացքում առաջին հերթին մենք սովորում ենք այն լեզուն, որով խոսում են մեր ծնողներն ու մոտ ազգականները: Այն դառնում է մեր հիմնական, հարազատ լեզուն:

Եթե գիտենք միայն մեր հարազատ լեզուն և հանդիպում ենք մի մարդու, ով նույնպես կարողանում է խոսել միայն իր հարազատ, բայց մեզ անծանոթ լեզվով, ուրեմն մեր շփումը սահմանափակ է: Այդ դեպքում մենք ստիպված ենք հույս դնել ժեստերի, գլխով նշաններ անելու, նկարելու, շրջապատի առարկաների վրա:

Լեզուն մարդկային մշակույթի անբաժանելի մասն է: Եթե ցանկանում ենք շփման մեջ արդյունավետ լինել և հաղթահարել մշակութային խոչընդոտները, պետք է սովորենք նրանց լեզուն, ում հետ շփվում ենք:

Սիրո հարցում էլ իրավիճակը նույնն է: Ձեր էմոցիոնալ լեզուն կարող է տարբերվել ձեր ամուսնու (կնոջ) լեզվից այնպես, ինչպես չինարենը անգլերենից: Նշանակություն չունի, թե անգլերեն խոսելով ինչ ջանասիրությամբ կփորձեք արտահայտել ձեր սերը: Եթե ձեր ամուսինը խոսում է միայն չինարեն, դուք այդպես էլ չեք հասկանա, թե որքան եք սիրում իրար: Անկեղծ լինելը բավարար չէ: Եթե ցանկանում եք սիրո հարցում ձեր շփումը հաջողված լինի, պետք է սովորեք նաև ամուսնու (կնոջ) սիրո հիմնական լեզուն:

<…>

Ելնելով ամուսնության և ընտանիքի խնդիրների խորհրդատվության իմ քսանամյա փորձից, եկել եմ այն եզրակացության, որ գոյություն ունի էմոցիոնալ սիրո հինգ հիմնական լեզու, հինգ միջոց, որոնց օգնությամբ մարդիկ արտահայտում և ընկալում են իրենց էմոցիոնալ սերը:

---

Գարի Չապմանի «Սիրո 5 լեզուն» գիրքը (ռուսերեն լեզվով) կարող եք ստանալ նվեր, եթե                          info@iverh.com հասցեին ուղարկեք նամակ՝ տեղեկացնելով այդ մասին:

---

Հազվադեպ է լինում, որ ամուսնու և կնոջ սիրո հիմնական լեզուները համընկնեն: Մենք փորձում ենք խոսել սիրո մեր հիմնական լեզվով և շփոթության մեջ ենք ընկնում, երբ մեր ամուսինը կամ կինը չեն հասկանում, թե ինչ ենք մենք ուզում արտահայտել:

Արտահայտում ենք մեր սերը, բայց ուղերձը չի հասնում հասցեատիրոջը, քանի որ այն, ինչ մենք ասում ենք, նրա համար հնչում է օտար լեզվով:

Հենց դրանում է ողջ խնդիրը, և այս գքի նպատակը լուծում առաջարկելն է: Հենց որ կբացահայտեք, թե որոնք են սիրո հինգ լեզուները, կհասկանաք, թե դրանցից ո՞րն է սիրո՝ ձեր հիմնական լեզուն և ո՞րը ամուսնունը կամ կնոջինը, և կսկսեք խոսել դրանով, դուք կգտնեք երկարատև և սիրով լի ամուսնության բանալին:

Մենք չենք կարող հույսը դնել մեր հարազատ լեզվի վրա, եթե մեր ամուսինը (կինը) այն չի հասկանում: Եթե ցանկանում ենք, որ նա զգա այն սերը, որը փորձում ենք արտահայտել, մենք պետք է արտահայտենք այն նրա սիրո հիմնական լեզվով:

<…>

Ես այս գիրքը չեմ գրել այն բանի համար, որ այն, գիտական աշխատության նման, փոշով պատվի քոլեջների և համալսարանների գրապահարաններում: Չնայած, հույս ունեմ, որ սոցիոլոգիայի և հոգեբանության դասախոսներն այն օգտակար կհամարեն ամուսնության և ընտանեկան հարաբերությունների դասընթացների համար:

Ես այս գիրքը գրել եմ ոչ թե նրանց համար, ովքեր զբաղվում են ամուսնության խնդիրների ուսումնասիրմամբ, այլ նրանց, ովքեր ամուսնացած են, ովքեր ապրել են «սիրահարվածության» էյֆորիան, ովքեր ամուսնացել են միմյանց շատ երջանիկ դարձնելու վեհ երազանքներով, բայց առօրյա կյանքի իրականությունում կանգնել են այդ երազանքը կորցնելու սահմանին:

Եվ ես հույս ունեմ, որ կարդալով այս գիրքը, հազարավոր ամուսնական զույգեր ոչ միայն կվերգտնեն իրենց երազանքը, այլև կկարողանան այն իրականություն դարձնել:

Գարի Չապման

---

Գարի Չապմանի «Սիրո 5 լեզուն» գիրքը (ռուսերեն լեզվով) կարող եք ստանալ նվեր, եթե                          info@iverh.com հասցեին ուղարկեք նամակ՝ տեղեկացնելով այդ մասին:

---