Տագնապային խանգարում. ինչպե՞ս օգնել մտերիմին
Նրանք, ովքեր չգիտեն ինչ է տագնապային խանգարումը, դժվար պատկերացնեն, թե դրանց նոպաներն ինչպես են կաթվածահար անում մարդուն: Ի՞նչ է պետք իմանալ, որպեսզի նման պահերին ճիշտ օգնենք մեր մտերիմին: Այդ մասին, իհարկե, ամենից լավ կպատմեն հենց իրենք՝ տագնապային խանգարումով տառապող մարդիկ:
Եվ այսպես, ի՞նչ են ապրում տագնապային խանգարում ունեցող մարդիկ նոպայի պահին, ինչպիսի՞ օգնություն ու աջակցություն են սպասում մտերիմներից:
Լավագույնը, որ կարող եք անել, մինչև վերջ լսելն է
Ոչ ոք ձեզնից որևէ պատասխան չի սպասում: Դուք չեք կարող «բուժել» մեզ, եթե նույնիսկ շատ եք ուզում: Պարզապես լսեք մինչև վերջ: Հասկացրեք, որ մեր կողքին եք և պատրաստ օգնության: Չափից դուրս կպչուն մի եղեք, եթե տեսնում եք, որ դա մեզ համար տհաճ է: Բայց նաև բաց մի թողեք այն պահը, երբ մեզ համար կարևոր է, որ ինչ-որ մեկը գրկի մեզ:
Ձեր աջակցությունը մեզ համար ամեն ինչ է
Ես հանդիպում եմ մեկի հետ, բայց գիտեմ, որ ինձ սիրելը հեշտ չէ: Ես հաճախ ազդում եմ նրա նյարդերի վրա, և նա չի կարողանում հասկանալ, թե ինչու եմ ինձ այդպես պահում: Բայց, երբ ես խորասուզված եմ անվերջ տարակուսանքների և տագնապային մտորումների մեջ, ինձ համար կարևոր է իմանալ, որ նա ընդունում է մեր տարբերությունները և շարունակում է սիրել ինձ նույնիսկ այն պահերին, երբ ինքս եմ դժվարանում ինձ սիրել:
Մեզ մի ասեք «ուղղակի հանգստացի»
Դա չի օգնում, այլ ընդամենը նյարդայնացնում է: Մենք սովորաբար 100%-ով գիտենք, որ մեր տագնապը ռացիոնալ չէ: Հանգստանալու ձեր առաջարկը չի օգնի կախարդական ձևով անցկացնել այն:
Ծանր օրերին մի վիրավորվեք մեր վարքից
Հիշեք, որ մեր տագնապը կապված չէ ձեզ հետ, եթե նույնիսկ ձեզ թվում է, թե դուք այն հրահրեցիք: Պարզապես մենք սարսափելի գերլարվածություն ենք զգում: Տագնապի պատճառը մասամբ կապված է մեր ուղեղի աշխատանքի հետ, և այս պահին դրա հետ ոչինչ անել չենք կարող: Բայց կան նաև արտաքին գործոններ, որնց վրա կարելի է ազդել: Օգնեք մեզ շեղվել, դա կօգնի թեթևացնել մեր վիճակը:
Հիշեք, որ տագնապները տարբեր են լինում
Ծանր դեպրեսիայով և տագնապայնությամբ տառապող մարդկանց սիմպտոմները տարբեր կերպ են դրսևորվում: Այն, ինչ օգնում է մեկին, պարտադիր չէ, որ օգնի նաև մյուսին: Ծանր պահերին մեկը կարիք ունի ֆիզիկական կոնտակտի ու աջակցության: Իսկ մյուսն ուզում է, որ իրեն հանգիստ թողնեն: Եթե հասկանաք, թե դժվար պահերին ինչ է մեզ պետք, դա շատ կօգնի մեզ:
Մենք շատ շնորհակալ ենք ձեր համբերության համար
Համբերատարությունը մարդու կարևոր արժանիքներից է: Դուք միշտ չէ, որ հասկանում եք մեր տագնապները, բայց, միևնույն է, սեր և հոգատարություն եք ցուցաբերում: Իսկ դա գլխավորն է:
Կարդացեք նաև. 6 քայլ արդյունավետ անհանգստանալու համար
Որպեսզի մեզ ավելի լավ հասկանաք, կարդացեք տագնապային խանգարումների մասին
Ավելի շատ իմացեք այն խնդրի մասին, որով մենք տառապում ենք: Դա կօգնի ձեզ հասկանալ մեր ապրումները, իմանալ, որ դրանք մեզ համար ֆիզիկական հիվանդությունից պակաս իրական չեն:
Դուք չեք կարող «շտկել» խնդիրը, և դա նորմալ է
Մեր մտերիմները պետք է իմանան, որ տագնապի նոպայի հետ պարտադիր չէ ինչ-որ բան «անել»: Երբեմն մեզ մի քանի րոպե է պետք, որպեսզի հաղթահարենք դա:
Մեր ապրումներին լուրջ վերաբերվեք
Կարևոր է, որ մեր մտերիմները լուրջ վերաբերվեն մեր իրավիճակին, եթե նույնիսկ բժիշկներն ասում են, որ մեր կյանքին դա չի սպառնում: Մեզ համար դա շատ կարևոր է: Տագնապը երբեմն կաթվածահար է անում, և կարևոր է, որպեսզի լինի ինչ-որ մեկը, ով կհասկանա մեզ և արհամարհանքով չի ասի, որ դա «անհեթեթություն է»:
Հիշեցրեք մեզ, որ հոգ տանենք մեր մասին
Քաջալերեք մեր զբաղվելը ցանկացած առողջարար պրակտիկայով, օրինակ, յոգայով, պարով կամ զբոսանքով: Դուք կարող եք միանալ մեզ կամ պարզապես օգնել, որպեսզի դրանով զբաղվելու ժամանակ ունենանք:
Բացատրեք, որ պրոֆեսիոնալ օգնության դիմելն ամոթ չէ
Առաջարկեք համապատասխան օգնության դիմել: Տագնապային խանգարումները բուժելը կյանքն ավելի հանգիստ կդարձնի, իսկ երբեմն էլ նույնիսկ կարող է կյանք փրկել: Դա դրական ազդեցություն կունենա նաև մեր հարաբերությունների վրա:
Ծանր օրերին մեր կողքին եղեք
Եթե մեր կողքին մեզ լավ հասկացող մարդ կա, նա գիտի, որ երբեմն մեզ պետք է «թաքնվել պահարանում և որոշ ժամանակ նստել այնտեղ»: Եթե տագնապը մեզ շատ ուժեղ է տանջում, մենք չենք կարող ստիպել մեզ դուրս գալ այդ «անվտանգ թաքստոցից»: Հասկացեք դա և պարզապես մեր կողքին եղեք:
